Exposición

Un espectacular audiovisual que nos presenta a cultura castrexa dende dous puntos de vista: dunha forma global, como fenómeno característico do NO peninsular durante a Idade de Ferro; e dun xeito específico a través do impoñente castro de San Cibrao de Las, un dos xacementos arqueolóxicos máis relevantes de Galicia para esta etapa.

No percorrido pola exposición acompáñannos os pensamentos dos primeiros estudosos desta cultura, achegándonos así o sentir e a alma daquelas sociedades que habitaron neste territorio durante séculos. Un territorio marcado polos poboados fortificados que, como a vella Lansbrica, abren aquí as súas monumentais portas para que coñezamos como era o día a día das xentes que vivían no seu interior.

Este sector permítenos descubrir os principais trazos da Idade do Ferro e contextualizar a cultura castrexa propia do noroeste peninsular dentro do ámbito europeo. A Idade do Ferro desenvolveuse ao longo de máis de 1.000 anos na marxe atlántica europea e nela viviuse unha evolución e transformación das sociedades, dando orixe ao fenómeno que coñecemos como cultura castrexa.

Cómpre ser conscientes da profunda transformación que sufriu a paisaxe galega durante a Idade do Ferro como consecuencia da acción que estas sociedades exerceron sobre ela, humanizándoa e deixando pegadas que mesmo hoxe en día podemos detectar.

Un impresionante sistema defensivo que ao mesmo tempo pon de manifesto o prestixio e poder destas sociedades sobre o territorio, converténdose así en símbolo da comunidade que albergou.

O abandono da vida nómade maniféstase a través dos castros, asentamentos perfectamente planificados e organizados por familias en torno ao espazo doméstico: a casa. Nesta parte da exposición móstrasenos como era a vida cotiá dentro destes recintos fortificados e como estes se organizaban e especializaban en función dos recursos do territorio no que se asentan.

A apropiación do territorio implicou un aproveitamento do mesmo en función das necesidades da vida diaria: pedra e madeira para construír e para fabricar útiles, terras para o cultivo e o gando, animais para alimentarse e vestirse, minerais e metais para as ferramentas pero tamén para crear fermosas xoias… Neste sector descubriremos a importancia do espazo físico para o desenvolvemento da cultura castrexa.

Nesta sala da exposición atopamos respostas aos misterios do universo simbólico castrexo: coñecemos os deuses aos que rendían culto, a figura emblemática do guerreiro, o valor ritual das “pedras formosas” e da natureza como santuario…

A chegada dos romanos trouxo consigo un cambio en canto ás novas formas de explotar os recursos, á organización administrativa e xurídica do territorio, á implantación de redes de comercio estables dentro e fóra dos seus territorios e, principalmente, ao coñecemento da escritura. O contacto entrambas culturas vai marcar para sempre o devir desta sociedade.

Para coñecer o castro de Las resulta esencial acudir aos investigadores e arqueólogos que teñen participado tanto no estudo como nas sucesivas escavacións do castro; pois é grazas ao seu traballo e dedicación que puidemos descubrir e pouco a pouco saber máis sobre este xacemento tan representativo da cultura castrexa.

E se a visita á exposición aumentou a nosa curiosidade pola cultura castrexa, nesta sala poderemos consultar a realidade doutros castros do noso territorio e as súas particularidades. Ademais tamén temos a opción de divertirnos co xogo interactivo que nos converte en defensores dunha comunidade castrexa que debe protexerse ante a chegada dos romanos.